Published: 01-03-2018
دبئی:پاکستان کرکٹ ٹیم کے فاسٹ باؤلراور پی ایس ایل میں اسلام آباد یونائیٹڈ کی جانب سے پہلے دونوں میچوں میں قائم مقام کپتانی کے فرائض انجام دینے والے رومان رئیس نے کہا ہے کہ میرا خواب ہے کہ اپنے کیریئر میں بھارتی کپتان ویرات کوہلی کی وکٹ حاصل کروں اور دنیا کا نمبر ایک باؤلر بننا بھی ہدف ہے۔فاسٹ باؤلر نے اپنی خواہش کا اظہار کرتے ہوئے کہا کہ اگر اپنے کیریئر کے دوران کوہلی کو ایک مرتبہ بھی آؤٹ کرلیا تو میرے لئے یہ بڑی کامیابی ہوگی جبکہ ابھی تک کوہلی ،ڈویلیئرز،سٹیون سمتھ کو باؤلنگ کرانے کا موقع نہیں مل سکا ،میں چیلنج تو نہیں کرتا لیکن جب بھی موقع اور کوہلی کا سامنا ہوا تو بھرپور اعتماد کیساتھ باؤلنگ کرا کر وکٹ حاصل کروں گا۔رومان رئیس نے مزید کہا کہ نیوزی لینڈ کے کپتان کین ولیمسن کو آؤٹ کرنا بہت مشکل ہے لیکن گزشتہ سال میںنے ان کو چار بار پویلین کا راستہ دکھایا ،باؤلر کا کہنا تھا کہ بڑے کھلاڑیوں کے خلاف باؤلنگ کرنا مشکل ہوتا ہے اور کافی سیکھنے کا موقع بھی ملتا ہے۔لیفٹ آرم فاسٹ باؤلر نے کہا کہ میرا ہدف عالمی نمبر ایک بننا ہے جبکہ اپنی باؤلنگ میں مزید بہتری کیلئے بھرپور کوششیں کررہا ہوں۔یاد رہے کہ رومان کو 9 ون ڈے اور 8 ٹی20 انٹرنیشنل میچوں میں ملک کی نمائندگی کا اعزاز حاصل ہے اور پاکستان سپر لیگ میں اسلام آباد یونائیٹڈ کے کپتان مصباح الحق کے انجری کا شکار ہونے کے بعد رومان رئیس نے پہلے دو میچوں کپتانی کے فرائض انجام دیئے اور ان کی قیادت میں ٹیم ایک میچ ہاری جبکہ ایک میں شکست کا سامنا کرنا پڑا۔
